Aprobación do Plan Estratéxico do Cooperativismo en Galicia
13/12/2004
Ó igual que en 2003 o Día do Cooperativismo fora o marco elixido para a presentación do Libro Branco do Cooperativismo en Galicia, neste segundo ano de celebración o acto coincidiu coa presentación do Plan Estratéxico do Cooperativismo en Galicia, que se contempla como unha continuación do traballo desenvolvido para a elaboración do Libro Branco, e a través do cal se pretende concretar e aplicar á realidade do cooperativismo galego as conclusións e obxectivos ós que se chegou a través deste estudo. Nesta xornada festiva para o movemento cooperativo galego tamén se fixo entrega dos premios que anualmente concede o Consello Galego de Cooperativas, tanto ós escolares que participan nos concursos de debuxo, pintura, vídeo e proxectos cooperativos como ás entidades que concorren ós Premios á Cooperación; este ano dúas cooperativas socias de AGACA, Coren e Cecoop, recibiron cadanseu galardón nas categorías de innovación e intercooperación, respectivamente.
A conselleira de Asuntos Sociais, Emprego e Relacións Laborais, Belén Prado, foi a encargada de presidir o acto de presentación do Plan Estratéxico do Cooperativismo en Galicia, un documento no que se abordan de xeito integral as potencialidades do modelo cooperativo en Galicia e se marcan as pautas para o desenvolvemento futuro do sector.
Belén Prado destacou a importancia da fórmula cooperativa dentro da economía galega, "non só por ser un tipo de actividade xerador de emprego e de riqueza, senón polos principios e valores que caracterizan esta forma propia de facer empresa, e tamén polo seu compromiso coa comunidade na que desenvolve o seu labor, sobre todo no ámbito rural, onde as cooperativas son os verdadeiros motores do seu progreso".
Este Plan Estratéxico aborda de xeito integral o desenvolvemento das potencialidades do modelo cooperativo en Galicia, a través de doce áreas estratéxicas, cada unha delas desenvolvida por unha comisión de traballo formada por expertos en cada unha das áreas: socios cooperativistas, técnicos das cooperativas e das súas organizacións representativas, membros da administración, especialistas do ámbito universitario...
Deste xeito tratouse de que foran os propios axentes do sector os que deran forma ó documento, aproveitando o seu contacto coa realidade do sector, de maneira que o resultado final vaia acorde coas verdadeiras necesidades do cooperativismo en Galicia, e tratando tamén de implicar a tódalas partes nun proxecto de futuro no que será necesaria a colaboración de todos para levar á práctica todo o que este Plan Estratéxico recolle.
O plan dá cabida ós aspectos transversais e sectoriais do cooperativismo galego. No primeiro caso, analizáronse os aspectos empresariais e societarios, os aspectos financeiros, a colaboración coas institucións públicas, o emprego cooperativo, a formación e investigación como base sobre a que asentar os diferentes proxectos... Polas súa banda, na vertente sectorial revisáronse as demandas agrupadas baixo criterios de afinidade por clases.
No caso do cooperativismo agrario, os obxectivos céntrase en liñas de traballo como o dimensionamento e a integración, a profesionalización do sector, o fomento da industrialización e a comercialización, o control e a xestión medioambiental e o fomento do asociacionismo, entre outros (na revista nº 70 de Cooperación Galega recóllense tódolos obxectivos incluídos no Plan Estratéxico).
Premios para cooperativas e escolares
Unha vez rematada a presentación do Plan Estratéxico, o Día do Cooperativismo Galego completouse coa entrega dos premios outorgados polo Consello Galego de Cooperativas, tanto na súa categoría escolar (debuxo e pintura, vídeo e proxectos cooperativos) como nos convocados para as entidades cooperativas galegas nos seus diferentes apartados (innovación, intercooperación e promoción do cooperativismo).
O premio á innovación recaeu na cooperativa ourensá Coren, socia de AGACA, mentres que o premio á intercooperación foi parar á cooperativa de segundo grao Cecoop, dedicada á compra conxunta de produtos para as explotacións agrarias dos socios das súas máis de 60 cooperativas, e que tamén forma parte da Unión de Cooperativas AGACA. A categoría de promoción do cooperativismo repartiu o seu premio entre as cooperativas Cauru e Consumo Consciente Árbore.
O conselleiro de Educación, Celso Currás, quen presidiu esta entrega de premios, amosou a súa satisfacción pola existencia duns galardóns que sirven para promocionar o cooperativismo no ámbito escolar; o conselleiro de Educación tamén fixo referencia na súa intervención á importancia do autoemprego como vía de desenvolvemento das inquedanzas dos emprendedores.
A entrega de premios contou tamén coa presenza da conselleira de Asuntos Sociais, quen clausurou o acto coa lectura dunha declaración institucional con motivo da celebración deste Día do Cooperativismo Galego, na que insistiu novamente no papel preponderante das cooperativas como garantes no mantemento do benestar e a cohesión social, e na necesidade que esta fórmula asociativa ten de adaptarse ás esixencias dos novos escenarios comerciais e económicos.
Consello Galego de Cooperativas -
Edificio Administrativo San Lázaro, Consellería de Traballoe Benestar - 2º andar
15781 Santiago de Compostela - Teléfono: 881 999 268 - Política de Privacidade - Financiado por Equal FSE
Máis Novas
Relacionadas
Biblioteca
Relacionada
Mapa de www.cooperativasdegalicia.com