As cooperativas baséanse nos valores da autoaxuda, da autoresponsabilidade, da democracia, da igualdade, da equidade e da solidariedade. Na tradición dos seus fundadores, as socias e socios cooperativos creen nos valores éticos da honestidade, a transparencia, a responsabilidade social e a preocupación polos demais.

Os principios cooperativos son pautas mediante as que se poñen en práctica os valores

I. Adhesión voluntaria e aberta

As cooperativas son organizacións voluntarias, abertas a todas as persoas capaces de utilizar os seus servizos e dispostas a aceptar as responsabilidades de ser socio ou socia, sen discriminación social, política, relixiosa, racial ou de xénero.

II. Xestión democrática

As cooperativas son organizacións democráticas controladas polos seus membros, que participan activamente na fixación das súas políticas e na toma de decisións. Os homes e mulleres elixidos para representar e xestionar as cooperativas son responsables ante as persoas socias. Nas cooperativas de primeiro grao, as persoas socias teñen iguais dereitos de voto, e as cooperativas doutros graos tamén se organizan con procedementos democráticos.

III. Participación económica dos socios e socias

As persoas socias contribúen equitativamente e controlan de xeito democrático o capital da cooperativa. Polo menos unha parte dos activos é por regra xeral, propiedade común da cooperativa. Usualmente reciben unha compensación, se existe, limitada sobre o capital achegado como condición para ser socio ou socia. As persoas socias asignan os excedentes para todos ou algún dos seguintes fins: ao desenvolvemento da súa cooperativa mediante a posible creación de reservas, das que, polo menos unha parte debe ser indivisible; ao beneficio dos socios e socias en proporción ás súas operacións coa cooperativa; e ao apoio doutras actividades aprobadas por elas.

IV. Autonomía e independencia

As cooperativas son organizacións autónomas, de autoaxuda, xestionadas polas súas persoas socias. Se asinan acordos con outras organizacións, incluídos os gobernos, ou se consiguen capital de fontes externas, realízano en termos que aseguren o control democrático por parte dos seus socios e socias e manteñan a súa autonomía cooperativa.

V. Educación, formación e información

As cooperativas brindan educación e formación ás persoas socias, ás elixidas para representalas, ao persoal directivo e empregado, para que poidan contribuír de xeito eficaz ao desenvolvemento das súas cooperativas. Informan ao público en xeral, especialmente á xuventude e aos líderes de opinión, sobre a natureza e os beneficios da cooperación.

VI. Cooperación entre cooperativas

As cooperativas serven ás súas persoas socias máis eficazmente e fortalecen o movemento cooperativo, traballando conxuntamente mediante estruturas locais, nacionais, rexionais e internacionais.

VII. Interese pola comunidade

As cooperativas traballan para o desenvolvemento sostible das súas comunidades mediante políticas aprobadas polas súas persoas socias.