O obxectivo principal é asesorar, promover e fomentar as producións agrarias sostibles (integrada e ecolóxica) no seo das cooperativas agrarias do medio rural galego, para adaptar os seus produtos cara ás novas esixencias dos mercados e cara ó respecto polo medio no que se desenvolve a actividade agraria.
A obtención polos agricultores de produtos agrícolas de calidade e saudables para o consumidor, mediante o emprego de prácticas de cultivo que respecten o medio ambiente, é un obxectivo prioritario da agricultura moderna.
O respecto polo medio ambiente e a supervivencia económica das explotacións agrarias é un dos grandes retos da agricultura do Século XXI.
O sistema para levar á práctica os obxectivos dunha agricultura sostible, sen esquecer un sector minoritario como é a agricultura ecolóxica, é a produción integrada.
A produción integrada é, actualmente, unha das mellores opcións para a agricultura de futuro, xa que debe compaxinar a rendibilidade das explotacións coa protección do medio ambiente.
Trátase, por tanto, de desenvolver un sistema de obtención de alimentos que sexa quen de dar bos rendementos, óptimas calidades e baixos niveis de residuos, causando, ademais, unha mínima degradación do entorno.
Por isto, as tecnoloxías e as prácticas de cultivo utilizadas na produción integrada deber ter sido rigorosamente estudiadas e seleccionadas con vista a unha mellor utilización dos recursos naturais e a un máximo aproveitamento dos sistemas biolóxicos de defensa das plantas.
Este novo modelo agrícola presenta, por conseguinte, unhas amplas posibilidades de ser implantado masivamente en agrupacións ou asociacións de agricultores, polos indubidables beneficios e vantaxes que ofrece.
Consello Galego de Cooperativas -
Edificio Administrativo San Lázaro, Consellería de Traballoe Benestar - 2º andar
15781 Santiago de Compostela - Teléfono: 881 999 268 - Política de Privacidade - Financiado por Equal FSE
Mapa de www.cooperativasdegalicia.com