O Ministerio de Agricultura, Alimentación e Medio Ambiente expón ás Comunidades Autónomas as medidas de impulso ao cooperativismo agroalimentario no Programa de Desenvolvemento Rural
26/10/2015
Ministerio de Agricultura presenta ás Comunidades Autónomas os apoios á integración asociativa a partir de 2016.
Na reunión detalláronse as submedidas de integración asociativa previstas no Programa Nacional de Desenvolvemento Rural.
A Dirección Xeral da Industria Alimentaria, do Ministerio de Agricultura, Alimentación e Medio Ambiente explicou ás Comunidades Autónomas, na terceira reunión do Grupo de Traballo do Plan Estatal de Integración Asociativa, a situación das normas reguladoras das axudas ao asociacionismo agroalimentario, que se van poñer en marcha non só con orzamento nacional, senón tamén a través das axudas contidas na programación de desenvolvemento rural con financiamento do FEADER.
Este Grupo de Traballo está constituído por representantes do Ministerio de Agricultura, Alimentación e Medio Ambiente, do Ministerio de Emprego e Seguridade Social, e de varias Consellerías das Comunidades Autónomas.
En relación coas axudas de ámbito nacional, o Ministerio informou de que o Consello de Ministros aprobará, en breve, un Real Decreto coas bases reguladoras para a concesión de subvencións destinadas ao fomento da integración de entidades asociativas agroalimentarias de ámbito supra-autonómico.
Así mesmo, na reunión detallouse que as submedidas de integración asociativa, previstas no Programa Nacional de Desenvolvemento Rural, articularanse en seis reais decretos de bases reguladoras de apoio, cuxa tramitación está moi avanzada. Por tanto, espérase que as axudas se poidan convocar a comezos de 2016.
En concreto, trátase de axudas para a formación e información de Entidades Asociativas Prioritarias, ademais de apoios á constitución de servizos de asesoramento por Entidades Asociativas Prioritarias. Tamén contemplan axudas aos investimentos das Entidades Asociativas Prioritarias e o apoio a proxectos de cooperación nos que, polo menos, un dos actores sexa unha Entidade Asociativa Prioritaria recoñecida.
Por outra banda, no encontro abordouse a situación, a nivel autonómico e supra-autonómico, das figuras prioritarias no ámbito cooperativo, así como o estado de tramitación de normas de axudas a estas figuras.
Por último, o Ministerio expuxo o traballo, iniciado en colaboración co Ministerio de Emprego e Seguridade Social, para mellorar o coñecemento do cooperativismo agroalimentario en España. Para iso, están a analizarse as fontes de información co obxectivo de mellorar os datos dispoñibles e ter así e un adecuado coñecemento do cooperativismo agroalimentario en España.
Consello Galego de Cooperativas -
Edificio Administrativo San Lázaro, Consellería de Traballoe Benestar - 2º andar
15781 Santiago de Compostela - Teléfono: 881 999 268 - Política de Privacidade - Financiado por Equal FSE
Máis Novas
Relacionadas
Biblioteca
Relacionada
Mapa de www.cooperativasdegalicia.com