AGACA rexeita o anteproxecto de Lei de Prevención do Consumo de Bebidas Alcohólicas por Menores
19/06/2014
Aínda estando de acordo coa finalidade última do documento de traballo do Anteproxecto de Lei de Prevención do Consumo de Bebidas Alcohólicas por Menores e os seus Efectos, que procura previr o consumo de alcohol entre os menores de idade, considera desproporcionadas e ineficaces as medidas a adoptar, atentando directamente contra a liberdade individual dos adultos que, a diario, consumen viño de xeito moderado.
O problema está no mal uso que se fai dos produtos, é un problema de conduta, polo que, prohibir, reprimir, marxinar e demonizar o produto afástase do que debería constituír a prioridade para as autoridades: a educación e prevención.
Precisamente, en materia de educación e prevención, o sector do viño xa está a implementar o programa europeo Wine in Moderation, que defende o consumo responsable do viño como unha norma social e cultural. Ademais, o Anteproxecto de Lei contradí á Lei da Viña e o Viño aprobada polo Parlamento Español en 2003 onde se define ao viño como un alimento e se recoñece a posibilidade de promover o fomento do consumo moderado e responsable do viño no ámbito da Dieta Mediterránea, mentres que agora quere prohibirse.
As cooperativas entendemos que unha Lei como esta contribuiría a fomentar un descenso no consumo entre a poboación adulta o que, poría en risco a supervivencia de toda unha industria tan relevante no PIB español, e tan importante para a estabilidade de rexións tan vinculadas a este alimento como poden ser, en Galicia, as Rías Baixas, o Ribeiro, a Ribeira Sacra, Valdeorras ou Monterrei.
Nos últimos 30 anos tense constatada unha diminución continuada do consumo do viño en España, que alcanza o 40 mentres que, no mesmo período, os problemas derivados do alcohol en mozos víronse aumentados, o que reforza a percepción de que o problema non está no viño en si mesmo, senón na conduta ou comportamento.
O viño non debe considerarse como un simple ben de consumo, é un valor da nosa civilización, enraizado coa cultura, a historia e a propia identidade ademais de supoñer un importante valor económico en moitas das nosas comarcas.
Consello Galego de Cooperativas -
Edificio Administrativo San Lázaro, Consellería de Traballoe Benestar - 2º andar
15781 Santiago de Compostela - Teléfono: 881 999 268 - Política de Privacidade - Financiado por Equal FSE
Máis Novas
Relacionadas
Biblioteca
Relacionada
Mapa de www.cooperativasdegalicia.com