Bases xerais

  1. 1. Os traballos presentados deberán ser elaborados por un único autor ou equipo de autores, e deberán axeitarse á temática e contido do Encontro Internacional das Cooperativas, é dicir versará sobre calquera aspecto que teña relación con experiencias de boas prácticas ou de cooperativas exitosas, tanto no aspecto económico e social, de distintas partes do mundo.

  2. 2. A inscrición ao concurso é gratuíta e o prazo límite para a recepción dos traballos finaliza o 25 de xuño de 2012. 

  3. 3. Para participar no concurso deberá cumprimentarse a ficha de inscrición ás xornadas integramente, e enviar o traballo en formato dixital ao correo info@cooperativas2012.coop sinalando a modalidade de participación: Póster ou Fotografía.

  4. 4. Poderán remitirse un máximo de 3 fotografías por autor ou equipo de autores.

  5. 5. Poderá remitirse un único póster  por autor ou equipo de autores, que deberá ir acompañado dun resumo escrito, dun mínimo de dúas e un máximo de cinco páxinas, en formato DIN-A4, en Word, en tipo de letra Arial 12, a dobre espazo.

  6. 6. A selección de finalistas e a designación de gañadores, realizarase a través dun sistema mixto, no que participaran técnicos designados polo Consello Galego de Cooperativas que asignarán o 50% da puntuación outorgada a cada obra, adxudicándose o restante 50% mediante votación realizada a través da web.

  7. 7. As persoas elixidas como finalistas poderán ver os seus traballos destacados na exposición do Encontro Internacional de Cooperativas de Santiago de Compostela e serán obsequiados con material bibliográfico e promocional do Consello Galego de Cooperativas. Designaranse unicamente como gañadores aos traballos que acaden o primeiro, segundo e terceiro posto sendo obxecto de recoñecemento no Encontro Cooperativo mediante a entrega dun galardón de distinción como tales e publicando en sitio destacado o seu traballo, tanto na web cooperativasdegalicia.com como na Mostra exposición que acompaña ao Encontro Cooperativo.

  8. 8. Os traballos fotográficos e os pósters gañadores serán expostos na Mostra Cooperativa cos respectivos créditos. Así mesmo, poderán ser utilizados en diferentes publicacións e materiais impresos polo Consello Galego de Cooperativas. O autor ou autores autorizan expresamente ao Consello Galego de Cooperativas e a Xunta de Galicia para a utilización gratuíta e sen ánimo de lucro, das fotografías e posters presentados ao concurso.

 

 

 

 

 

 

 

 

"As cooperativas son un recordatorio á comunidade internacional de que é posible perseguir a viabilidade económica e responsabilidade social".

Ban Ki-moon, secretario xeral das Nacións Unidas